Məqalədə sabit qanadlı pilotsuz uçuş aparatlarından (PUA) geniş ərazilərdə hava çirklənməsinin monitorinqi üçün istifadə məsələsi nəzərdən keçirilir. Ənənəvi çoxrotorlu dronlar (kvadrokopterlər) dəqiq lokal nümunə götürmə imkanı versə də, onların məhdud uçuş müddəti və aşağı sürəti əhatə dairəsini məhdudlaşdırır. Sabit qanadlı PUA-lar isə əksinə, daha yüksək sürət və hündürlüklərdə uzun məsafələr qət edə bilir ki, bu da onları kənd təsərrüfatı sahələri, şəhər zonaları və ya sənaye kori dorları kimi geniş ərazilərin monitorinqi üçün ideal vasitəyə çevirir. Həmçinin məqalədə PUA-da quraşdırılmış sensorlar vasitəsilə izlənilə bilən əsas hava çirkləndiricilərinə nəzarət üçün təyyarə tipli aparatlardan istifadənin texniki mümkünlüyünə toxunulmuşdur. Bununla əlaqədar real praktiki nümunələr təqdim edilmiş, mövcud texnoloji məhdudiyyətlər və sabit qanadlı PUA-ların IoT şəbəkələri ilə birləşdirilməsinin gələcək potensialı təsvir olunmuşdur. Əsas məqsəd tədqiqatçıları, ətraf mühitin mühafizə orqanlarını və operatorları havanın keyfiyyətinin hərtərəfli qiymətləndirilməsi üçün sabit qanadlı PUA-lardan istifadənin faydaları haqqında məlumatlandırmaqdan ibarətdir.